الموضوع: الفوركس ألف باء - محاضرة رقم 3

Tweet

بسم الله الرحمن الرحيم

دورة أرباحك فى الفوريكس للمبتدئين


الدرس الثالث

سنتكلم فى هذا الدرس عن بعض المصطلحات الجديدة وما يتعلق بها.

الشركات الوسيطة:

الشركات الوسيطه هى الشركات التى تسمح لك بفتح حساب لديها والمتاجرة من خلالها. الشركات الوسيطه تكسب عن طريق الفارق بين سعر البيع والشراء فى العملات وكلما كانت الشركة الوسيطه جيده كلما قل الفارق بين سعر البيع والشراء من خلالها Spread.

المتاجرة بالهامش Margin:

ذكرنا فى الدرس السابق إن أسعار العملات بتتغير بالبيب ... ودى زى ما قولنا قيمة صغيرة جدا جدا ... يعنى علشان نكسب مبلغ معقول يبقى لازم نتاجر بمبلغ كبير جدا ... 10 ألاف ... 100 ألف ... مليون. طبعا مش أى حد يمتلك المبلغ الكبير ده علشان يتاجر بيه ... طيب والحل؟

الحل يكمن فيما يسمى بالمتاجرة بالهامش Margin أو بعض الناس تسميه الرافعه المالية. نظام الهامش ده عبارة عن طريقة تقدر عن طريقها تتاجر فى مبالغ كبيرة على الرغم من أن رأس مالك صغير ... إزاى ؟؟؟

شوف يا سيدى ... دلوقتى لو فرضنا إنك إشتريت 10 ألاف من زوج العملات EUR/USD ... طبعا إشتريت يبقى متوقع السوق يتحرك إزاى ؟؟؟ لأعلى أم لأسفل يعنى السعر حيزيد ولا حيقل ؟ حد جاوب ؟؟ أكيد يبقى إنت متوقع السوق حيتحرك لأعلى يعنى سعر الزوج ده حيغلى ... وبالتالى حتبيع 10 ألاف دول تانى لما السعر يزيد. نرجع لمثالنا ... لو سعر الزوج ده زاد بقيمة واحد بيب يبقى إنت كسبت قد إيه ... نحسبها 0.0001 * 10000 = 1 دولار ... يعنى حركة السوق 1 بيب لأعلى تكسبك واحد دولار ... طيب وحركته العكس ؟؟ تخسرك 1 دولار برضه.

يعنى معنى كده إنك مش محتاج 10 ألاف دولار فعليا لأنك لما بتكسب أو بتخسر بتتعامل بمبلغ أقل بكتير من 10 ألاف دولار وهو فعليا واحد دولار لكل بيب. وبالتالى النقطة دى هى اللى بتستغلها الشركات الوسيطة علشان تكسب عملاء إنها تفتح ليك حساب بمبلغ صغير وتسمحلك إنك تتاجر بمبلغ كبير بالمقابل ... وطبعا مش حتسمحلك إنك تخسر أكثر من المبلغ اللى إنت فاتح بيه الحساب. ودى نقطه كويسه إنك مهما خسرت عمرك ما حتطلع مديون للشركة أبدا.

وهنا بقه يظهر مصطلح تانى وهو Leaverage بصراحه مش لاقيله ترجمه عربى تدخل دماغى ... بس هما بيترجموه "الرافعه المالية" وده عبارة عن نسبة المبلغ اللى بتحطه فى حسابك فعليا مقابل المبلغ اللى تقدر تتاجر بيه فعليا. يعنى لو قولنا إن شركة وسيطه ما عندها Leaverage = 100 يعنى كل دولار بتحطه فى حسابك فعليا بتسمحلك إنك تشترى أو تبيع مقابله 100 دولار. وبالتالى لو حاطط مبلغ 100 دولار مثلا فى حسابك يبقى ممكن تشترى أو تبيع بقيمة 100 * 100 = 10 ألاف دولار. يبقى إنت حسابك الفعلى فيه 100 دولار بس تقدر تدخل السوق لحد مبلغ 10 ألاف دولار. ولو Leaverage = 200 يبقى لو إنت عندك 100 دولار فى حسابك تقدر تتاجر بقيمة 20 ألف دولار. وهكذا ...

طيب لو حسابك فيه 100 دولار والوسيط عنده Leaverage قيمته 100 وإنت اشتريت 10 ألاف من زوج العملات EUR/USD مثلا والسوق تحرك لأسفل يبقى إنت حتبدأ تخسر ... بس 100 دولار اللى فى حسابك كلهم محجوزين مقابل عملية الشراء 10 ألاف EUR/USD يعنى الوسيط مش حيلاقى مبلغ ياخده مقابل خسارتك دى وبالتالى مش حيسمحلك ... وحيقفل العملية فورا ببيع زوج العملات ده مرة أخرى ... يعنى بمعنى أوضح علشان تقدر تتاجر لازم حيابك يكون فيه أكثر من 100 دولار دول ... علشان الوسيط يسمحلك بالإستمرار فى فتح العمليات عند تحرك السوق فى إتجاه الخسارة.

طيب نتكلم على مثال عملى ... حنفترض إنك فاتح حساب فيه مبلغ 300 دولار والوسيط ده Leaverage عنده 200 ... وعايز تشترى 10 ألاف EUR/USD ... كام حيكون المبلغ الضمان للعملية دى ؟؟ نحسبها ... 200 دى معناها كل دولار تحطه ممكن تتاجر فى مقابله بـ 200 دولار يعنى لو عايزين نتاجر بـ 10000 دولار يبقى محتاجين 10000/200 = 50 دولار. يعنى الوسيط حيحجز من حسابك مبلغ 50 دولار ضمان علشان تقدر تشترى 10 ألاف EUR/USD. طيب لما تشترى حيكون رصيدك المتاح فى حسابك هو 250 دولار بس ... يعنى عندك سماحية لحد خسارة مقدارها 250 دولار ... وإحنا قولنا إن 1 بيب فى حالة المبلغ ده تساوى دولار ... يعنى عندك سماحية إنك تخسر لحد 250 بيب أو إن السوق يتحرك لأسف أو إن سعر الزوج ده يقل بمقدار 250 بيب عن السعر اللى إنت شارى بيه. لو حصل والسوق تحرك بالشكل ده ونزل 250 بيب حيقوم الوسيط بإغلاق العملية فورا وبالتالى حتكون خسرت 250 دولار ويرجعلك مبلغ الضمان لحسابك تانى اللى هو 50 دولار. طيب لو كسبت .. طبعا الوسيط عمره ما حيقفل العملية لأن أى مكسب سيضاف إلى رصيدك بمجرد إغلاق العملية. ها وضحت الرؤيه ؟؟

أنواع الحسابات:

يوجد ثلاث أنواع من الحسابات فى الفوريكس

1- الحساب Standard أو القياسى وفى هذا الحساب يكون عمليات الشراء والبيع تتم بمبلغ 100 ألف من العملة ويسمى هذا بـ Lot أو اللوط وتكون قيمة البيب فى حدود 10 دولار. ويمكن فتح هذا النوع من الحسابات بمبلغ فى حدود 5000 دولار.

2- الحساب المضغر Mini وفى هذا النوع عمليات البيع والشراء تتم على قيمة 10 ألاف من العملة ويسمى هذا بـ Mini Lot وبالتالى تكون قيمة البيب فى حدود 1 دولار. ويمكن فتح هذا النوع من الحسابات بمبلغ فى حدود 300 دولار.

3- الحساب الميكرو Micro وفى هذا النوع من الحسابات تتم عمليات البيع والشراء بمبالغ ألف من العملة. ويكوت سعر البيب فى حدود 0.1 من الدولار. ويمكن فتح هذا النوع من الحسابات بمبلغ فى حدود 25 دولار.

المشاركة الأصلية كتبت بواسطة ma7amad88

سؤال معلش انت في المثال اللي انت حاططه بتقول ان لازم يكون في رصيدك 50 دولار وبعد كدة رجعت قلت 250 دولار ده منين انا مش فاهم تاني حاجة هو انا ما أقدرش ابيع واشتري في اي وقت ولا هو بمجرد الارتفاع او الانخفاض لازم عملية البيع تتم لأن انت بتقول ان لما السعر يقل الشركة بتعم اغلاق معلش انا مش فاهم الحتة دي واسف على الاطالة

( حنفترض إنك فاتح حساب فيه مبلغ 300 دولار والوسيط ده Leaverage عنده 200 ... وعايز تشترى 10 ألاف EUR/USD ... كام حيكون المبلغ الضمان للعملية دى ؟؟ نحسبها ... 200 دى معناها كل دولار تحطه ممكن تتاجر فى مقابله بـ 200 دولار يعنى لو عايزين نتاجر بـ 10000 دولار يبقى محتاجين 10000/200 = 50 دولار. يعنى الوسيط حيحجز من حسابك مبلغ 50 دولار ضمان علشان تقدر تشترى 10 ألاف EUR/USD

شوف اخى فى خطأ فى فهم المثال استاذنا افترض تواجد مبلغ 300 دولار
ولما فتحنا الصفقه الشركه بتحجز ال 50 دولار كضمان عشان تقدر تشترى ال 10 الاف من الزوج يورو دولار EUR/USD
وبكدا هيفضل فى الحساب مبلغ 250 لغايه لما يتم اقفال الصفقه ويضاف الربح وتخصم الخسارة .
بالنسبه للسؤال التانى بخصوص وقت البيع والشراء من ناحيه التوقيت فمفيش اى مشكله
اما الى بيحدد البيع او شراء هو تحليلك بناءا على مؤشرات فنيه او تحليلك الخاص فاذا دل على ارتفاع الزوج بيتم الشراء والعكس صحيح.

اما حكايه ان الشركه بتغلق الصفقه فده بيحصل ف حاله ان حضرتك مثلا قمت بتحليل خطا وفضل السعر ينزل وينزل لغايه اما يوصل للمبلغ المحتجز وميفضل فى الرصيد غيره الى هو طبعا ال 50 دولار الى اتحجزو فوق هنا الشركه بتقفل الصفقه . غير كدا الصفقه بتفضل مفتوحه طول محسابك يغطى النزول .
اتمنى اكون افدتك ومترددش ف اى سؤال او استفسار
Alex

هو طبعا لازم نعمل مواضيع كتير للفوريكس
بس انا مش بعرف افهم غير بالصوت
لانه بيفهم اكتر من الكتابه

بصراحة الدرس جميل جدا ومفهوم

لكن بالنسبة لآخر نقطة و هي " أنواع الحسابات"

مذكور بس 3 أنواع .. العادي و المصغر و الميكرو

لكن إحنا في المحاضرة تطرقنا لـ4 أنواع ..

اللي هم الحسابات الـ3 المذكورة بالإضافة الى حساب الميني ميكرو

ياريت تضيفه للقائمة

عشان دورت على مميزاته في الدروس الموجودة و ما لقيتهاش ..

تحديدا كنت عايزة أعرف قيمة اللوت في هذا الحساب كم تساوي من العملة



وشكرا

المشاركة الأصلية كتبت بواسطة yasmiiiiin

بصراحة الدرس جميل جدا ومفهوم

لكن بالنسبة لآخر نقطة و هي " أنواع الحسابات"

مذكور بس 3 أنواع .. العادي و المصغر و الميكرو

لكن إحنا في المحاضرة تطرقنا لـ4 أنواع ..

اللي هم الحسابات الـ3 المذكورة بالإضافة الى حساب الميني ميكرو

ياريت تضيفه للقائمة

عشان دورت على مميزاته في الدروس الموجودة و ما لقيتهاش ..

تحديدا كنت عايزة أعرف قيمة اللوت في هذا الحساب كم تساوي من العملة



وشكرا

أهلا بيكى أخت ياسمين وشكرا لتشريفك للموضوع.

بالنسبة للدروس دى فهى قديمة فعلا وتم تطوير منهج الدورة بشكل كبير جدا عما هو مكتوب هنا وسيتم طرحها فى كتاب كامل باذن الله بعد الإنتهاء منه حيث وصل لأكثر من 50 صفحة من شرح مستفيض وأمثلة والكثير باذن الله.

بالنسبة لسؤالك فالحساب الصغير المينى ميكرو يمكنك فتح صفقات فيه بقيمة 1 سنت للنقطة ويمكن فتح الحساب بمبلغ 1 دولار فقط ولكن عمليا يفضل الا يقل المبلغ عن 10 دولار مع فتح الصفقات 1 سنت للنقطة.

وبالتوفيق

المشاركة الأصلية كتبت بواسطة yasmiiiiin

الشكر ليك يا أستاذ إيهاب

ما تتصورش المحاضرات المكتوبة فادتني قد إيه

برغم إنها قديمة شوية زي ما حضرتك قلت .. لكنها تحتوي على نفس تسلسل الدروس الي بنحضرها حاليا

كنت باراجع بيها أول بأول و هذا ساعدني جدا على استيعاب المعلومات أكثر

و أنا في انتظار نزول الكتاب بإذن الله .. لأنه سيكون مرجع رائع لكل مبتدىء في الفوريكس

و بالنسبة لإجابة السؤال أنا فهمت منها إن :

- سعر النقطة (pip) يساوي 0.01 من الدولار يعني واحد سنت

- و الحد الأدنى لفتح الحساب هو واحد دولار

طيب فاضل نقطة الي هي قيمة اللوت (lot)

يعني في حساب الميني ميكرو تتم عمليات البيع و الشراء بمبغ كام من العملة ؟؟

أنا استنتجت دلوقت قيمة لكن عايزة أعرف صح ولا غلط

- الحساب standard قيمة اللوت فيه = 100.000 من العملة

- الحساب المصغر mini قيمة اللوت فيه = 10.000 من العملة

- الحساب الميكرو micro قيمة اللوت فيه = 1.000 من العملة

إذاُ قيمة اللوت في الحساب الميني ميكرو يفترض أن تكون 100 من العملة

يعني بصيغة أخرى حساب الميني ميكرو تتم عمليات البيع و الشراء فيه بمبلغ 100 من العملة

صح ؟؟

مظبوط يا ياسمين استنتاجك صح حجم اللوت حيكون 100 وحده من زوج العملات.

وان شاء الله الكتاب حيكون متاح قريب.